जनकपुर, २७ भदौ । जनता समाजवादी पार्टी (नेपाल)का अध्यक्ष उपेन्द्र यादवले मधेश प्रदेश स्थापना भए पनि पूर्ण अधिकारका लागि ‘मधेश राज्य’ निर्माणको संघर्ष आवश्यक रहेको बताएका छन्।
जनकपुरमा आयोजित ९ दलीय अग्रगामी मोर्चाको मधेश प्रदेशस्तरीय भेलालाई सम्बोधन गर्दै यादवले आफ्नै शासन–प्रशासन, कानुन, भाषा र सांस्कृतिक अधिकार सुनिश्चित नभएसम्म मधेशी जनताले पूर्ण अधिकार नपाउने बताए।
उनले वर्तमान सरकारलाई ‘कठपुतली सरकार’को संज्ञा दिँदै संविधान संशोधन तथा संघीयता सुदृढीकरणमा सरकार पछि हटेको आरोप लगाए। जनसंख्याका आधारमा प्रतिनिधित्व सुनिश्चित गर्न निर्वाचन प्रणाली परिवर्तन गर्नुपर्ने उनको भनाइ छ।
किसानले मल, बीउ, सिँचाइ र उचित बजार नपाएको उल्लेख गर्दै यादवले ग्रामीण बैंकमार्फत सहुलियतपूर्ण ऋण उपलब्ध गराउनुपर्ने बताए। छठपछि पनि न्याय र अधिकार सुनिश्चित नभए मोर्चाले थप सशक्त आन्दोलन गर्ने चेतावनीसमेत उनले दिए।
जनकपुरमा अग्रगामी मोर्चाको भेलामा अपेक्षाभन्दा बढी कार्यकर्ता सहभागी
