जनकपुर, २७ भदौ । ९ दलीय अग्रगामी मोर्चाले देशको बहुआयामिक सङ्कट समाधान, विगतका उपलब्धिको रक्षा र जनताका थप अधिकार सुनिश्चित गर्ने उद्देश्यसहित संगठन सुदृढीकरणमा जोड दिएको छ।
जनकपुरमा आयोजित मधेस प्रदेशस्तरीय कार्यकर्ता भेला तथा अभिमुखीकरणमा जनमत पार्टीका अध्यक्ष डा. सीके राउतले जसपा नेपालका अध्यक्ष उपेन्द्र यादवलाई राज्यले नियतवश फसाउन खोजेको आरोप लगाउँदै आफूलाई पनि विगतमा यस्ता प्रयास भएको बताए। उनले आपसी समस्या छलफलबाट समाधान गर्दै नेतृत्व र कार्यकर्ताको मनोबल बढाउनुपर्नेमा जोड दिए।
आम जनता पार्टीका अध्यक्ष प्रभु साहले मोर्चा कुनै सरकार ढाल्ने उद्देश्यले नभई राजनीतिक, आर्थिक, सामाजिक तथा प्राकृतिक सङ्कटबाट देशलाई निकास दिन गठन गरिएको स्पष्ट पारे। उनले एकता, संगठन र जनताको सहभागिताबाट मात्रै वर्तमान समस्या समाधान गर्न सकिने बताए।
त्यस्तै, नागरिक उन्मुक्ति पार्टी नेपालका अध्यक्ष रेशम चौधरीले लाल आयोगको प्रतिवेदन सार्वजनिक नगरेर मधेसी र थारु समुदायलाई अन्याय गरिएको गुनासो गरे। उनले आन्दोलनका क्रममा हिरासतमा रहेका कार्यकर्ताको रिहाइ तथा अधिकारका लागि सबै शक्ति एकजुट हुनुपर्ने बताए।
