जनकपुर, १९ कात्तिक । तिहार, नेपाल संवत् र छठ पर्वलाई सुरक्षित तथा शान्तिपूर्ण बनाउन नेपाल प्रहरीले देशभर विशेष सुरक्षा योजना लागू गरेको छ।
सम्भावित चोरी, लुटपाट, जुवातास, कालोबजारी र पटका प्रयोग नियन्त्रण गर्न ५० हजारभन्दा बढी प्रहरी परिचालन गरिएको हो।
प्रहरी प्रवक्ता अभि नारायण काफ्लेका अनुसार चाडपर्वका बेला हुने भीडभाडलाई व्यवस्थित गर्न ५० भन्दा बढी ड्रोन, सीसीटीभी र तालिमप्राप्त कुकुरमार्फत निगरानी गरिनेछ। यात्रुको सहजताका लागि ४०८ स्थानमा यात्रु सहायता कक्ष र सीमा क्षेत्रमा १०८ नागरिक सहायता कक्ष स्थापना गरिएको छ।
प्रहरीले पटका तथा विस्फोटक पदार्थ प्रयोग नगर्न आग्रह गर्दै त्यस्ता गतिविधि देखिए प्रहरीको हटलाइन नम्बर १०० मा खबर गर्न अनुरोध गरेको छ। साथै घर खाली राखेर बाहिर जाँदा सामाजिक सञ्जालमा जानकारी सार्वजनिक नगर्न र शंकास्पद गतिविधिप्रति सचेत रहन पनि नागरिकलाई आग्रह गरेको छ।
प्रहरीका अनुसार उक्त विशेष सुरक्षा योजना छठ पर्वको भोलिपल्टसम्म लागू रहनेछ।
