काठमाडौं, १० असोज । अरनिको राजमार्गअन्तर्गत सिन्धुपाल्चोकको बलेफी गाउँपालिका–५ मा आज (शुक्रबार) बिहान दूध बोकेको भ्यान सुनकोसी नदीमा खसेको छ ।
जिल्ला प्रहरी कार्यालय सिन्धुपाल्चोकका प्रवक्ता डीएसपी माधवराज खरेलका अनुसार बिहान करिब ५ः२० बजे बा १२ च ६५९४ नम्बरको मारुती भ्यान सडकबाट करीब ५० मिटर तल खसेर नदीमा बेपत्ता भएको हो ।
भ्यान बलेफी–५ बाट दूध लिएर खाडीचौरतर्फ जाँदै गर्दा दुर्घटना भएको प्रहरीले बताएको छ । गाडीमा चालक मात्र रहेका थिए । चालक काभ्रे, पनौती नगरपालिका–१०, पस्थलीका करिब २३ वर्षीय नवराज खुलाल भएको पुष्टि भएको छ ।
चौतारा साँगाचोकगढी–१० सुकेटेस्थित सिन्धु दूध डेरी को उक्त भ्यान हाल बेपत्ता छ । खोजी कार्यमा सशस्त्र प्रहरी बल गण नं. १६ सिन्धुपाल्चोक र लामोसाँघुस्थित सुरक्षा बेसका विपद् व्यवस्थापन टोली परिचालन गरिएको सशस्त्र प्रहरीले जनाएको छ ।
