काठमाडौं, ३ असोज । नेकपा एमालेका अध्यक्ष केपी शर्मा ओलीले नेपाललाई गलत दिशातर्फ लैजान विभिन्न शक्तिहरू सक्रिय रहेको आरोप लगाएका छन्।
संविधान दिवसका अवसरमा च्यासलस्थित एमाले कार्यालयमा आयोजित कार्यक्रममा ओलीले गत भदौ २३ र २४ गतेका घटनालाई लोकतान्त्रिक विधि र संवैधानिक प्रणाली कमजोर बनाउने प्रयासका रूपमा व्याख्या गरे।
उनले उक्त घटनामा को–को संलग्न थिए भन्ने विषय क्रमशः खुल्दै गएको दाबी गर्दै अन्तर्राष्ट्रिय सञ्चारमाध्यम बीबीसीले समेत फागुन २१ गतेको निर्वाचनमार्फत नेपाललाई गलत दिशातर्फ धकेल्ने प्रयास गरेको आरोप लगाए। यी आरोप ओलीको दाबीका रूपमा प्रस्तुत गरिएका हुन्।
ओलीले संविधान जारी भएयता विभिन्न चुनौतीका बीच संविधानको रक्षा र कार्यान्वयन गर्दै आएको एमालेको दाबी पनि दोहोर्याए।
