काठमाडौं, १४ असोज । परराष्ट्रमन्त्री शिशिर खनालले भोटेकोशी बाढीपछि नेपालको पुनर्निर्माण तथा जलवायु संकटसँग जुध्न अन्तर्राष्ट्रिय समुदायले सहयोगको चासो देखाएको बताएका छन्।
संयुक्त राष्ट्रसंघको ८१औँ महासभामा सहभागी भएर स्वदेश फर्किएका मन्त्री खनालले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै महासभाका क्रममा भएका द्विपक्षीय तथा साइडलाइन भेटवार्तामा भोटेकोशी बाढीबाट भएको क्षतिप्रति विभिन्न देश र निकायले ऐक्यबद्धता जनाएको बताए।
उनका अनुसार बाढीपछिको पुनर्निर्माणमा नेपाललाई कसरी सहयोग गर्न सकिन्छ भन्ने विषयमा अन्तर्राष्ट्रिय प्रतिनिधिहरूले चासो राखेका थिए। साथै, जलवायु परिवर्तनका कारण नेपालले भोगिरहेको विपद्प्रति पनि विश्व समुदाय गम्भीर रहेको उनले बताए।
मन्त्री खनालले महासभामा प्रधानमन्त्रीको सम्बोधन तथा उच्चस्तरीय भेटवार्ताबाट नेपालको राष्ट्रिय हित, जलवायु संकट र जलवायु न्यायका विषयलाई अन्तर्राष्ट्रिय मञ्चमा थप प्रभावकारी रूपमा उठाउन सकिएको दाबी गरे।
