काठमाडौं, १४ असोज । सङ्घीय संसद् प्रतिनिधिसभाको बैठक आज दिउँसो १ बजे बस्दैछ। बैठकमा विभिन्न विधेयकलाई दफावार छलफलका लागि सम्बन्धित समितिमा पठाउने प्रस्ताव पेस हुने कार्यसूची छ।
कानुनमन्त्री सोविता गौतमले मेलमिलापसम्बन्धी दोस्रो संशोधन, नेपाल कानुन आयोग पहिलो संशोधन र निःशुल्क कानुनी सहायतासम्बन्धी विधेयक समितिमा पठाउने प्रस्ताव प्रस्तुत गर्नेछिन्।
त्यस्तै, कृषि, वन तथा पर्यावरणमन्त्री गिता चौधरीले सङ्क्रामक पशु रोग नियन्त्रण विधेयक र विज्ञान, प्रविधि तथा नवप्रवर्तनमन्त्री महावीर पुनले राष्ट्रिय विधि विज्ञान प्रयोगशाला स्थापना तथा सञ्चालन विधेयक पारित गरियोस् भन्ने प्रस्ताव पेस गर्नेछन्।
आज चार संसदीय समितिका बैठकसमेत बस्ने संसद् सचिवालयले जनाएको छ।
