जनकपुर, २ मंसिर । प्रतिनिधिसभा सदस्य तथा पूर्वाधार विकास समितिका सदस्य राजकिशोर महतोले धनुषासहित आसपासका क्षेत्रमा लामो समयदेखि अधुरो अवस्थामा रहेका सडक, पुल तथा अन्य पूर्वाधार संरचनाहरूको निर्माण कार्य शीघ्र सम्पन्न गराउन सम्बन्धित निकायको ध्यानाकर्षण गराएका छन्।
यसै विषयलाई लिएर सांसद महतोको उपस्थितिमा सडक डिभिजन कार्यालय जनकपुरमा सम्बन्धित सरकारी निकायका प्रमुखहरूसँग छलफल गरिएको छ।
छलफलमा सडक डिभिजन कार्यालय जनकपुरका प्रमुख, हुलाकी राजमार्ग आयोजना प्रमुख, खानेपानी तथा ढल व्यवस्थापन कार्यालयका प्रमुख र कमला–बागमती–पथलैया आयोजना प्रमुख सहभागी भएका थिए।
छलफलका क्रममा निर्माणाधीन तथा अधुरा अवस्थामा रहेका पुल, सडक र अन्य पूर्वाधार आयोजनाहरूको वर्तमान अवस्था, निर्माणमा देखिएका समस्या तथा काम सम्पन्न हुन भइरहेको ढिलाइका विषयमा चर्चा गरिएको थियो।
सांसद महतोले नागरिकको दैनिक जीवनसँग प्रत्यक्ष जोडिएका सडक, पुल, खानेपानी तथा ढल व्यवस्थापनजस्ता आधारभूत पूर्वाधारको निर्माणमा ढिलाइ हुँदा स्थानीयवासीले विभिन्न समस्या भोग्नुपरेको विषय उठाएका थिए। उनले अधुरा आयोजनालाई प्राथमिकतामा राखेर निर्माण कार्यलाई तीव्रता दिन तथा निर्धारित समयभित्र सम्पन्न गर्ने वातावरण बनाउन सम्बन्धित कार्यालयका प्रमुखहरूलाई आग्रह गरेका छन्।
त्यस्तै, विभिन्न आयोजनामा देखिएका प्राविधिक तथा प्रशासनिक समस्याको पहिचान गरी आवश्यक समन्वय र सहकार्यका माध्यमबाट समाधान खोज्नुपर्नेमा समेत छलफल भएको थियो।














