जनकपुर, १४ जेष्ठ। मधेश प्रदेश सरकारका गृह, सञ्चार तथा कानून मन्त्री फकिरा महतोले मुस्लिम धर्मावलम्बीहरूको महान पर्व इद–उल–अजहा (बकर इद) को अवसरमा शुभकामना व्यक्त गरेका छन्।
मन्त्री महतोले शुभकामना सन्देश जारी गर्दै देश तथा विदेशमा रहेका सम्पूर्ण मुस्लिम समुदायमा हार्दिक बधाई तथा शुभकामना व्यक्त गरेका हुन्। उनले इद–उल–अजहा त्याग, बलिदान, आस्था र अल्लाहप्रतिको समर्पणको प्रतीक पर्व भएको उल्लेख गरेका छन्।
सन्देशमा हजरत इब्राहिम (अ.स.) को बलिदानको स्मरणमा मनाइने यस पर्वले मानवता, करुणा, सहिष्णुता र परोपकारको भावना अभिवृद्धि गर्न प्रेरणा दिने उल्लेख गरिएको छ। साथै पर्वले समाजमा भाइचारा, सद्भाव, मेलमिलाप र सामाजिक एकताको भावना मजबुत बनाउने विश्वास व्यक्त गरिएको छ।
मन्त्री महतोले मधेश प्रदेश विविध धर्म, संस्कृति र समुदायबीचको सहअस्तित्व तथा सामाजिक सद्भावको उत्कृष्ट उदाहरण रहेको उल्लेख गर्दै प्रदेश सरकार सर्वधर्म समभाव, सामाजिक न्याय तथा समावेशी विकासप्रति प्रतिबद्ध रहेको बताएका छन्।
