काठमाडौँ, ३० भदौ । नेपाली कांग्रेसका पूर्वसभापति शेरबहादुर देउवाले आफूलाई कुनै पदको लोभ नभएको बताएका छन्।
तर पार्टी वा राज्यले आफ्नो अनुभव आवश्यक ठानेमा जीवनको अन्तिम समयसम्म जिम्मेवारी निर्वाह गर्न तयार रहेको उनले स्पष्ट पारेका छन्। भदौ ३० गते जारी अपिलमा देउवाले कांग्रेसको १४औँ महाधिवेशनबाट निर्वाचित सभापतिका रूपमा १५औँ महाधिवेशन सम्पन्न गरी नेतृत्व हस्तान्तरण गर्नु आफ्नो वैधानिक, राजनीतिक र नैतिक दायित्व भएको बताएका छन्।
उनले पार्टीभित्रको विवादप्रति चिन्ता व्यक्त गर्दै अदालतमा विशेष महाधिवेशनको वैधता सम्बन्धी विषय विचाराधीन रहेकाले त्यसको अन्तिम निर्णयअघि नयाँ महाधिवेशन प्रक्रिया अघि बढाउनु उचित नहुने दाबी गरेका छन्।
देउवाले अवैधानिक विशेष महाधिवेशनबाट आएको समूहले आयोजना गर्ने महाधिवेशनमा सहभागी नहुन कांग्रेसका नेता–कार्यकर्तालाई आग्रह गर्दै मंसिर २१, २२ र २३ गते हुने १५औँ महाधिवेशनको तयारीमा एकताबद्ध भएर जुट्न अपिल गरेका छन्।
साथै, भोटेकोशी बाढीपीडितको खोज, उद्धार, राहत र पुनर्निर्माणमा एकजुट हुन पनि उनले आग्रह गरेका छन्।
