काठमाडौँ, १२ फागुन । सरकारले आसन्न प्रतिनिधिसभा निर्वाचनलाई लक्षित गर्दै देशभरको सुरक्षा व्यवस्थालाई थप मजबुद र प्रभावकारी बनाउने निर्णय गरेको छ ।
मंगलबार गृह मन्त्रालयमा बसेको केन्द्रीय सुरक्षा समितिको बैठकले निर्वाचन सुरक्षाका लागि चारवटै सुरक्षा निकायबाट शीघ्र परिचालन हुनसक्ने गरी थप जगेडा सुरक्षा फोर्स बढाउने निर्णय गरेको हो ।
बैठक समिति अध्यक्ष एवं गृहमन्त्री ओमप्रकाश अर्यालको अध्यक्षतामा सम्पन्न भएको थियो । बैठकमा गृहमन्त्री अर्यालले निर्वाचन स्वतन्त्र, निष्पक्ष र शान्तिपूर्ण वातावरणमा सम्पन्न गराउन सुरक्षा व्यवस्थापनमा कुनै कमजोरी हुन नदिन निर्देशन दिए ।
उनले सबै सुरक्षा निकायबीच प्रभावकारी समन्वय, सूचनाको आदान–प्रदान तथा फिल्डस्तरमा तत्काल निर्णय लिन सक्ने संयन्त्र सक्रिय बनाउन जोड दिए ।
निर्वाचन अवधिभर सम्भावित जोखिम न्यूनीकरण, संवेदनशील क्षेत्रको पहिचान र आवश्यक परे तुरुन्तै सुरक्षा परिचालन हुने गरी तयारी अवस्थामा रहन सुरक्षा निकायलाई निर्देशन दिइएको गृह मन्त्रालयले जनाएको छ ।
सरकारले निर्वाचन प्रक्रिया नागरिकको विश्वास जित्ने वातावरणमा सम्पन्न गराउन सुरक्षा पहिलो प्राथमिकतामा राखेको जनाएको छ ।
