महोत्तरी, ११ फागुन । महोत्तरी निर्वाचन क्षेत्र नं. २ बाट प्रतिनिधिसभा सदस्यका उम्मेदवार डा. राकेश मण्डलले फरक र रचनात्मक शैली अपनाउँदै चुनावी प्रचारलाई तीव्र बनाएका छन् ।
उनले पछिल्लो समय सडक नाटकमार्फत मतदातालाई आफ्नो चुनावी एजेन्डा र भावी योजना बुझाउन थालेका हुन् । गाउँ-टोल, चोक-चौराहा र सार्वजनिक स्थानमा प्रस्तुत गरिने सडक नाटकमार्फत मण्डलले शिक्षा, स्वास्थ्य, रोजगारी र स्थानीय विकासका विषयलाई प्राथमिकताका साथ उठाइरहेका छन् ।
नाटकमार्फत राजनीतिक सन्देश दिँदा आम मतदाताले सजिलै बुझ्ने र प्रत्यक्ष रूपमा जोडिन सक्ने उनले बताए । यसका साथै, डा. मण्डल खेत–खेतमा पुगेर विशेष गरी महिला मतदातासँग भेटघाट गर्दै मतदान गर्न आग्रह गरिरहेका छन् ।
महिला मतदातासँगको प्रत्यक्ष संवादले उनीहरूको समस्या, आवश्यकता र चाहना बुझ्न सहयोग पुगेको मण्डले बताए । डा. मण्डल उज्यालो नेपाल पार्टीबाट उम्मेदवार बनेका हुन् ।
उनको चुनाव चिन्ह बल छाप रहेको छ । फरक ढंगको प्रचार शैली र जनतासँगको प्रत्यक्ष पहुँचका कारण उनको अभियानले स्थानीय स्तरमा चर्चा पाउन थालेको छ ।
