काठमाडौं, ५ मंसिर । नेपाल प्रिमियर लिग (एनपीएल) को छैटौँ संस्करणदेखि प्रतियोगिता होम एन्ड अवे प्रणालीमा सञ्चालन गर्ने तयारी गरिएको छ। यसका लागि सहभागी आठवटै टोलीका लागि फ्लडलाइटसहितका छुट्टाछुट्टै क्रिकेट रंगशाला निर्माण गर्ने प्रधानमन्त्री बालेन्द्र शाहले घोषणा गरेका छन्।
एनपीएलको उपाधि जितेको सुदूरपश्चिम रोयल्सलाई बधाई दिँदै प्रधानमन्त्री शाहले नेपाली क्रिकेटको व्यावसायिक विकासका लागि सरकारले आवश्यक पूर्वाधार निर्माण गर्ने बताएका हुन्।
सरकारी योजनाअनुसार विराटनगर, लुम्बिनी, कर्णाली, सुदूरपश्चिम, काठमाडौं, पोखरा, जनकपुर र चितवनमा आठवटा रंगशाला निर्माण तथा स्तरोन्नति गरिनेछ।
त्यसअन्तर्गत विराटनगर किंग्सका लागि बैजनाथपुर, लुम्बिनी लायन्सका लागि सिद्धार्थ, कर्णाली याक्सका लागि सुर्खेत, सुदूरपश्चिम रोयल्सका लागि फाप्ला, काठमाडौं गुर्खाजका लागि कीर्तिपुर, पोखरा एभेन्जर्सका लागि पोखरा, जनकपुर बोल्ट्सका लागि रामजानकी र चितवन राइनोजका लागि गौतमबुद्ध क्रिकेट रंगशालालाई घरेलु मैदानका रूपमा विकास गरिनेछ।
प्रधानमन्त्रीका अनुसार फाप्ला रंगशालाको निर्माण प्रक्रिया अघि बढिसकेको छ भने आगामी तीन महिनाभित्र अन्य रंगशालाको निर्माण प्रक्रिया पनि सुरु गरिनेछ। यी पूर्वाधार तयार भएपछि एनपीएल देशका विभिन्न सहरमा सञ्चालन गर्न सहज हुने सरकारको अपेक्षा छ।
होम एन्ड अवे प्रणाली लागू हुँदा स्थानीय दर्शकको सहभागिता बढ्नुका साथै क्रिकेटको लोकप्रियता र खेल पर्यटनसम्बन्धी आर्थिक गतिविधिमा समेत वृद्धि हुने विश्वास गरिएको छ।














