काठमाडौं, ५ मंसिर । नेपाली कांग्रेसका पूर्वसभापति शेरबहादुर देउवाले जेनजी आन्दोलनका क्रममा आफू र पत्नी आरजु राणा देउवाको ज्यान जेनजी युवाहरूले नै बचाएको दाबी गरेका छन्।
शनिबार कांग्रेसको देउवा पक्षीय गण्डकी प्रदेश अधिवेशनलाई सम्बोधन गर्दै उनले आन्दोलनका क्रममा आफूहरू गम्भीर जोखिममा परेको र पछि नेपाली सेनाको सहयोगमा उद्धार गरिएको बताए।
देउवाका अनुसार प्रदर्शनकारीले घर जाने बाटो अवरुद्ध गरेपछि हेलिकप्टरसमेत अवतरण हुन सकेको थिएन। त्यसपछि सेनाको गाडीमार्फत आफूहरूलाई सैनिक क्याम्प पुर्याइएको र त्यहीँ उपचारपछि ज्यान जोगिएको उनले बताए।
उनले जेनजी आन्दोलनको नाममा ५० वर्षभन्दा माथिका व्यक्तिहरूले समेत हिंसात्मक गतिविधि गरेको आरोप लगाउँदै आन्दोलनका घटनामा ठूलो षड्यन्त्र रहेको दाबी गरे।
त्यस्तै, बीपी कोइरालाका बुबाले बनाएको घर, गणेशमान सिंहको निवास र देशभरका कांग्रेस पार्टी कार्यालयमा भएको आक्रमणलाई कांग्रेसविरुद्धको षड्यन्त्रका रूपमा बुझ्नुपर्ने उनको भनाइ थियो।














