काठमाडौं, १५ असोज । नेपाली कांग्रेसका सभापति गगन थापाले पत्रकार पक्राउ प्रकरणलाई लिएर सरकारको आलोचना गर्दै प्रेस स्वतन्त्रता, नागरिक अधिकार र लोकतन्त्रमाथि हस्तक्षेप स्वीकार्य नहुने बताएका छन्।
सानेपास्थित पार्टी केन्द्रीय कार्यालयमा आयोजित विशेष सम्बोधनमा थापाले समाचार लेखेकै आधारमा सञ्चारगृहमा प्रवेश गरेर पत्रकार पक्राउ गर्नु निरंकुश शासनको झल्को भएको टिप्पणी गरे। उनले यस्तो कदमको कांग्रेसले सशक्त प्रतिवाद गर्ने चेतावनी दिए।
थापाले पत्रकार पक्राउ प्रकरणमा प्रधानमन्त्रीको सचिवालय र प्रहरीको भूमिका शङ्कास्पद देखिएको आरोप लगाए। प्रधानमन्त्रीको सचिवालयबाट पत्रकारहरूको सूची प्रहरीलाई पठाइएको विषय सार्वजनिक हुनुले सरकारको नियतमाथि प्रश्न उठाएको उनको भनाइ थियो।
पत्रकार पक्राउ परेर रिहा हुँदैमा घटना समाप्त नहुने स्पष्ट पार्दै उनले राज्यका निकायलाई व्यक्तिगत इच्छा र सामाजिक सञ्जालको प्रतिक्रियाका आधारमा सञ्चालन गर्न खोज्नु गम्भीर विषय भएको बताए।
सरकारमा रहेकाहरूले आफूलाई नै राज्य ठान्ने प्रवृत्ति देखाएको आरोप लगाउँदै थापाले व्यक्तिगत चाहनालाई कानुनभन्दा माथि राख्ने कार्यले लोकतान्त्रिक व्यवस्था र प्रेस स्वतन्त्रतालाई कमजोर बनाउने बताए।
