काठमाडौं, १५ कात्तिक । नागढुङ्गा सुरुङमार्ग प्रयोग गर्ने सवारीसाधनबाट आजदेखि सडक दस्तुर उठाउन सुरु गरिएको छ। आइतबार राति १२ बजेदेखि लागू हुने गरी सुरुङमार्ग भएर आवतजावत गर्ने सवारीसाधनले तोकिएको शुल्क तिर्नुपर्ने व्यवस्था गरिएको हो।
आयोजना प्रमुख इन्जिनियर सौजन्य नेपालका अनुसार सुरुङमार्ग प्रयोग गरी काठमाडौं भित्रिने र बाहिरिने सवारीसाधनले फरक–फरक दरमा दस्तुर बुझाउनुपर्नेछ।
निर्धारित दरअनुसार कार, जिप, भ्यान तथा माइक्रोबसले काठमाडौं भित्रिँदा ६५ रुपैयाँ र बाहिरिँदा ६० रुपैयाँ तिर्नुपर्नेछ। ठूला सवारीसाधनका लागि प्रवेश गर्दा ६०० रुपैयाँ र बाहिरिँदा २५० रुपैयाँ शुल्क निर्धारण गरिएको छ।
सुरुवाती चरणमा नगद र क्यूआरमार्फत भुक्तानी गर्न सकिनेछ। पछि आरएफआईडी कार्ड तथा ट्याग प्रणालीमार्फत स्वचालित शुल्क संकलन गर्ने तयारी गरिएको आयोजनाले जनाएको छ।
संकलित रकम सडक बोर्ड नेपालको खातामा जम्मा हुनेछ भने दस्तुर संकलनको सञ्चालन तथा अनुगमन सडक बोर्ड नेपाल र सडक विभागले गर्नेछन्।
