काठमाडौं, ८ कात्तिक । नेपाल क्रिकेट संघ (क्यान) ले नेपाल प्रिमियर लिग (एनपीएल) को तेस्रो संस्करण सञ्चालनका लागि सम्पूर्ण तयारी पूरा भएको जनाएको छ।
सोमबारदेखि कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा प्रतियोगिता सुरु हुँदैछ।
क्यानका अनुसार यस संस्करणबाट करिब ७० करोड रुपैयाँको आर्थिक कारोबार हुने र करिब २० करोड रुपैयाँ आम्दानी हुने अनुमान गरिएको छ।
प्रतियोगिताको विजेताले १ करोड ५० लाख रुपैयाँ, उपविजेताले ८० लाख रुपैयाँ तथा तेस्रो र चौथो हुने टोलीले क्रमशः ४० लाख र ३० लाख रुपैयाँ पुरस्कार पाउनेछन्।
प्रतियोगितालाई व्यवस्थित र आकर्षक बनाउन मैदान, डिजिटल स्कोरिङ, प्रत्यक्ष प्रसारण तथा दर्शक प्यारापिट व्यवस्थापनमा विशेष ध्यान दिइएको क्यानले जनाएको छ।
