काठमाडौं, ३ कार्तिक । स्वर्गीय पत्रकार वसन्तप्रकाश उपाध्यायको परिवारलाई सहयोग गर्न नेपाल अमेरिका पत्रकार संघ (नेजा) मार्फत संकलित १६ लाख ७ हजार ८३२ रुपैयाँ ९ पैसा नेपाल पत्रकार महासंघले प्राप्त गरेको छ।
महासंघका महासचिव रामप्रसाद दाहालले कात्तिक २ गते स्वर्गीय उपाध्यायकी धर्मपत्नी इन्दिरा कार्की उपाध्यायलाई १२ लाख ५ हजार ८७५ रुपैयाँको चेक हस्तान्तरण गरेका छन्। उक्त रकम उनको मिर्गौला रोगको उपचारमा सहयोग पुर्याउने उद्देश्यले प्रदान गरिएको हो।
बाँकी ४ लाख १ हजार ९५७ रुपैयाँ स्वर्गीय उपाध्यायका ९४ वर्षीय बुबा छायाँदत्त उपाध्यायको हेरचाहका लागि दशैँपछि उहाँकै खातामा जम्मा गरिने महासंघले जनाएको छ।
सहयोग संकलनमा योगदान पुर्याउने नेजा परिवार, अमेरिकामा रहेका तनहुँका शुभचिन्तक, तनहुँ अन्तर्राष्ट्रिय समाज र तनहुँ समाज पोखराप्रति महासंघले आभार व्यक्त गरेको छ।
