काठमाडौं, २८ असोज । प्रधानमन्त्री बालेन्द्र शाह (बालेन) को सम्भावित भारत भ्रमणबारे नेपाल र भारतबीच छलफल तीव्र बनेको छ।
भ्रमणको मिति मंसिर ७ देखि ९ गतेसम्म तय गर्ने विषयमा छलफल भइरहेको स्रोतले जनाएको छ। भारतमा आयोजित बिमस्टेकको पहिलो गृह मन्त्रीस्तरीय बैठकमा सहभागी गृहमन्त्री सुधन गुरुङ र भारतीय गृहमन्त्री अमित शाहबीच भएको भेटवार्तामा प्रधानमन्त्रीको भारत भ्रमणबारे चर्चा भएको थियो।
भारतस्थित नेपाली दूतावासका कार्यवाहक राजदूत सुरेन्द्र थापाका अनुसार भेटमा द्विपक्षीय सम्बन्ध, सुरक्षा सहकार्य र सीमा व्यवस्थापनका विषयमा छलफल भएको थियो। प्रधानमन्त्रीको भ्रमणबारे पनि कुराकानी भए पनि मिति भने आपसी सहमतिमा तय गरिने उनले बताएका छन्।
भ्रमणका लागि प्रधानमन्त्री तथा मन्त्रिपरिषद्को कार्यालय र परराष्ट्र मन्त्रालयले आवश्यक तयारी गरिरहेका छन्। भ्रमणमा भौतिक पूर्वाधार, विगतका द्विपक्षीय सम्झौताको कार्यान्वयन तथा भोटेकोशी बाढीबाट भएको क्षतिपछि भारतबाट प्राप्त हुन सक्ने सहयोग प्रमुख एजेन्डा बन्न सक्ने अधिकारीहरूले बताएका छन्।
यसैगरी, भारतको सहयोगमा निर्माण भएका नेपाल प्रहरी एकेडेमी, भैरहवाको एकीकृत जाँच चौकी र दार्चुलास्थित महाकाली नदीको पुल उद्घाटन गर्ने विषयमा पनि तयारी भइरहेको जनाइएको छ।
प्रधानमन्त्री शाह नियुक्त भएलगत्तै भारतीय प्रधानमन्त्री नरेन्द्र मोदीले उनलाई भारत भ्रमणको निम्तो दिएका थिए। यसअघि अर्थमन्त्री डा. स्वर्णिम वाग्ले र अन्य उच्चस्तरीय प्रतिनिधिको भारत भ्रमणले पनि दुई देशबीचको संवादलाई निरन्तरता दिएको छ।
