काठमाडौं, १० फागुन । निर्वाचन आयोगले आगामी प्रतिनिधिसभा निर्वाचनको प्रचारप्रसारका क्रममा निर्वाचन चिह्नको भौतिक स्वरूप प्रयोग गर्न नपाइने गरी कडाइ गरेको छ ।
सक्कली घण्टी, डोजर, खुकुरी जस्ता वस्तु प्रयोग गरी प्रचार गर्नु आचारसंहिता विपरीत हुने आयोगले स्पष्ट पारेको छ । पछिल्लो समय राष्ट्रिय स्वतन्त्र पार्टीका कार्यकर्ताले घण्टी बजाउँदै प्रचार गरेको भन्दै व्यापक गुनासो आएपछि आयोगले यस्तो निर्णय लिएको हो ।
यस विषयमा राष्ट्रिय प्रजातन्त्र पार्टी ले समेत आपत्ति जनाएको थियो । आयोगका प्रवक्ता नारायणप्रसाद भट्टराईद्वारा जारी सूचनामा आचारसंहिता उल्लंघन गरे तत्काल कारबाही हुने चेतावनी दिइएको छ ।
कतिपयले यस किसिमको प्रचारलाई बालेन शाहको ‘डोजर’ शैलीसँग तुलना गर्दै आलोचना गरेका थिए भने रवि लामिछाने नेतृत्वको दललाई लक्षित कदमका रूपमा समेत व्याख्या गरिएको छ ।
अब आयोगको निर्णयसँगै दलहरूले झण्डा र सामान्य चुनाव चिह्नमार्फत मात्रै प्रचार गर्नुपर्नेछ ।
