जनकपुरधाम,५ जेठ । आफ्नो पतिको दीर्घायुको कामना र दाम्पत्य जीवनको सुख समृद्धिका लागि मधेशका महिलाहरुले आज बरसाइत अर्थात बटसावित्री पर्व मनाईदै छन् ।
जेठ कृष्णपक्ष आमावश्याका दिन मनाईने बरसाइत पर्व नवविवाहिता र अन्य महिलाहरुले फरक विधिअनुसार मनाउने गरेका छन । नवविवाहिता महिलाहरुले पहिलो वरसाइत अनिवार्यरूपमा श्रीमानकै घरमा मनाउनुपर्छ ।
बिहीबार नहायखाय गरी सात्विक भोजन गरेपछि लुगादेखि चुरासम्मका सबै शुङ्गार र पहिरनका सामग्री माइतबाटै पठाइन्छ । आज बिहानै नुहाइ रातो, पहेँलोसहित विभिन्न रङको पहिरनमा नजिकको वरको रुखमुनि बसेर नवविवाहितले आफ्ना पतिका साथ पूजा गर्दैछन् । 
महिला पुरोहितले पर्वको मन्त्र उच्चारण गरी वरको जरामा पूजा गर्छन् । औला भिजाएर उमारिएको चना, मुंग र चामल) काँक्रो, केरा, स्याउ, अङ्गुर, आँप, लिची र नरिवल प्रसादको रुपमा वरको जरामा चढाएर सिन्दूरले रङ्ग्याउँछन् । प्रसाद चढाइसकेपछि बर्तालुले पतिलाई उभिन लगाएर वरको रुखमा सात फेरो पहेँलो र रातो धागोले बेर्ने गर्छन ।
यस पर्वको दिनमा बिहानै विवाहित महिला उठेर नदी अथवा पोखरीमा स्नान गरी बट वृक्षमुनि सावित्रीको आराधना र अर्चना गरेर धुमधामका साथ यसलाई मनाउने गर्दछन् । 
विभिन्न फलफूल, अक्षता, धुप, दीपसहित विवाहित महिला गीत गाउँदै बट वृक्ष भएको ठाउँमा गएर सावित्रीको पूजा गर्दछन् । पर्वमा पार्वती, सावित्री र नागको पनि पूजा गरिन्छ ।
सावित्रीले मृत पति सत्यवानको पुनर्जीवनका लागि यसरी नै पूजा गरेको धार्मिक ग्रन्थहरुमा उल्लेख छ ।
