काठमाडौँ,४ जेठ । नक्कली शरणार्थी प्रकरणमा संलग्नहरूलाई कडा भन्दा कडा सजायको माग गर्दै बिहीबार काठमाडौंमा सत्ता साझेदार नेकपा एकीकृत समाजवादीले विरोध प्रदर्शन गर्ने भएको छ ।
आयोजक एकीकृत समाजवादी, केन्द्रीय मोर्चा संगठन विभागका अनुुसार विरोध कार्यक्रम आज दिउँसो ३ बजे माइतीघर मण्डलामा आयोजना गरिने जनाएको छ ।
कार्यक्रमलाई पार्टीका अध्यक्ष माधवकुमार नेपाल, झलनाथ खनाललगायतले सम्बोधन गर्ने आयोजकले जानकारी दिएको छ । नक्कली भुटानी शरणार्थी काण्डका भ्रष्ट अपराधीहरूलाई कडाभन्दा कडा सजायको माग गर्दै विरोध प्रदर्शन’ गर्न लागिएको जनाइएको छ ।
नेपाली नागरिकलाई नक्कली भुटानी शरणार्थी बनाई अमेरिका पठाइदिने भन्दै करोडौँ रकम ठगी गरेको आरोपमा पूर्व उपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँणसमेत अहिलेसम्म १४ जनालाई पक्राउ परिसकेका छन् ।
उनीहरू अहिले काठमाडौं उपत्यकाकै विभिन्न प्रहरी कार्यालयका हिरासतमा छन् ।
