काठमाडौं, ११ कात्तिक । काठमाडौंस्थित केन्द्रीय रक्तसञ्चार केन्द्रमा रगतको मौज्दात घटेपछि नेपाल रेडक्रस सोसाइटीले सर्वसाधारणलाई रक्तदान गर्न आग्रह गरेको छ।
बडादसैँको लामो बिदाका कारण रक्तदान कार्यक्रम प्रभावित हुनु र अस्पतालमा रगतको माग बढ्नुले आपूर्तिमा समस्या देखिएको हो। केन्द्रका प्रमुख डा. प्रकाश यादवका अनुसार सबै रक्तसमूहको रगत तथा आवश्यक रक्तघटकको मौज्दात कम हुँदा बिरामीलाई समयमै रगत उपलब्ध गराउन कठिन भइरहेको छ।
रेडक्रसले तीन महिना पूरा भएका स्वयंसेवी रक्तदाता तथा १८ वर्षमाथिका स्वस्थ व्यक्तिलाई नजिकैको रक्तसञ्चार केन्द्रमा पुगेर रक्तदान गर्न अपिल गरेको छ।
रक्तदान वा रगतको आवश्यकताबारे जानकारी लिन ०१-५३८८४८५, ०१-५३८८४८६ वा हटलाइन ११३० मा सम्पर्क गर्न सकिने रेडक्रसले जनाएको छ।
