सिरहा, १० कात्तिक । सिरहाको गोलबजार नगरपालिकाका तत्कालीन नगरप्रमुख देवनाथ साह तेलीसहित ६ जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
मुद्दा दायर गरिएकामा तत्कालीन उपप्रमुख रेशमकुमारी थापा, प्रमुख प्रशासकीय अधिकृत श्रीधर केसी, निमित्त प्रमुख प्रशासकीय अधिकृत रामनारायण महतो, राजस्व शाखा प्रमुख दिनेश कुमार सहनी र ठेकेदार वीरेन्द्र कुमार यादव छन्।
आयोगका अनुसार आर्थिक वर्ष २०७७/७८ मा पशु हाटबजार, बाख्रा हाटबजार र गुद्री हाटबजारको राजस्व संकलन तथा ठेक्का व्यवस्थापनमा अनियमितता भएको आरोप छ। नगरपालिकाले कानुनी प्रक्रिया मिचेर ७३ लाख ३४ हजार ९१३ रुपैयाँ राजस्व छुट दिएको र सरकारी रकम हिनामिना भएको आयोगको दाबी छ।
आयोगले तत्कालीन नगरप्रमुख, उपप्रमुख र प्रमुख प्रशासकीय अधिकृतविरुद्ध जनही १ करोड ६० लाख ४६ हजार ३४४ रुपैयाँ १० पैसा बिगो मागदाबी गरेको छ।
त्यस्तै, निमित्त प्रमुख प्रशासकीय अधिकृत र राजस्व शाखा प्रमुखविरुद्ध जनही १ करोड ३३ लाख ११ हजार ४३१ रुपैयाँ १० पैसा तथा ठेकेदारविरुद्ध १ करोड ६० लाख ४६ हजार ३४४ रुपैयाँ १० पैसा बिगो कायम गरी सजायको माग गरिएको छ।
