काठमाडौं, १० कात्तिक । नेपाल प्रिमियर लिग (एनपीएल) मा कर्णाली याक्सले जनकपुर बोल्ट्सलाई १९ रनले पराजित गर्दै प्रतियोगितामा विजयी सुरुवात गरेको छ।
कीर्तिपुरस्थित त्रिवि क्रिकेट मैदानमा १३३ रनको लक्ष्य पछ्याएको जनकपुर १९.३ ओभरमा ११३ रनमै समेटियो। जनकपुरका अभिषेक तिवारीले सर्वाधिक २० रन बनाए भने मोइन अली र हरमीत सिंहले समान १९ रन जोडे।
कर्णालीका हुसेन तलात र युनिश ठकुरीले तीन–तीन विकेट लिए भने नन्दन यादवले दुई विकेट हात पारे।
यसअघि पहिले ब्याटिङ गरेको कर्णालीले २० ओभरमा ९ विकेट गुमाएर १३२ रन बनाएको थियो। उसका लागि अरिफुल इस्लामले ४३ र पवन सर्राफले ३७ रनको योगदान दिए। जनकपुरका हरमीत सिंहले तीन विकेट लिए पनि टोलीलाई जिताउन सकेनन्।
