काठमाडौं, ११ कात्तिक । सम्भावित भारी वर्षा, बाढी, पहिरो र डुबानबाट हुन सक्ने क्षति न्यूनीकरण गर्न स्वास्थ्य क्षेत्रलाई उच्च सतर्कतामा राखिएको छ।
मौसम पूर्वानुमान अनुसार कात्तिक १२ देखि १४ गतेसम्म देशका विभिन्न स्थानमा चट्याङ, हावाहुरी, मध्यमदेखि भारी वर्षा र हिमपात हुन सक्ने भएकाले स्वास्थ्य आपतकालीन तथा विपद् व्यवस्थापन इकाइले सातै प्रदेशलाई आवश्यक तयारी गर्न निर्देशन दिएको हो।
इकाइले आपतकालीन सम्पर्क व्यक्ति तोक्न, आकस्मिक चिकित्सकीय टोली, स्वास्थ्यकर्मी, औषधि, उपकरण र एम्बुलेन्स तयारी अवस्थामा राख्न आग्रह गरेको छ। साथै, अस्पताल तथा स्वास्थ्य क्षेत्रका साझेदार निकायसँग समन्वय गरी विपद्का बेला प्रभावितलाई तत्काल उपचार उपलब्ध गराउन भनिएको छ।
त्यसैगरी, एम्बुलेन्स सेवा प्रभावकारी बनाउन र स्वास्थ्य सम्बन्धी घटनाको विवरण दैनिक रूपमा अनिवार्य पठाउन पनि प्रदेशका स्वास्थ्य आपतकालीन केन्द्रहरूलाई निर्देशन दिइएको छ।
