जनकपुर, २७ कात्तिक । श्रीमतीको उपचारका क्रममा जनकपुर प्रादेशिक अस्पतालमा कुरुवा बसेका एक व्यक्ति मृत फेला परेपछि आफन्त तथा स्थानीय बासिन्दाले विरोध प्रदर्शन गर्दै जनकपुर–ढल्केबर सडकखण्ड अवरुद्ध गरेका छन्।
धनुषाको क्षिरेश्वरनाथ नगरपालिका–२ निवासी ४५ वर्षीय मैतु सदा तीन दिनदेखि सम्पर्कविहीन थिए। उनको शव बिहीबार जनकपुर प्रादेशिक अस्पतालको शवगृह नजिक फेला परेको थियो।
अस्पतालमा उपचाररत श्रीमतीको हेरचाहका लागि कुरुवा बसेका सदा अचानक बेपत्ता भएपछि मृत अवस्थामा भेटिएको घटनालाई परिवारजनले शंकास्पद भन्दै हत्या भएको आशंका गरेका छन्।
घटनाको निष्पक्ष छानबिन, संलग्न दोषीमाथि कारबाही तथा पीडित परिवारलाई उचित क्षतिपूर्ति उपलब्ध गराउन माग गर्दै आफन्त र स्थानीयले क्षिरेश्वरनाथ नगरपालिका–२ कुम्हरौलस्थित सडकमा अवरोध गरेका हुन्।
यसअघि बुधबार पनि मृतकका आफन्त तथा स्थानीयले प्रादेशिक अस्पताल परिसरमा प्रदर्शन गर्दै घटनाको सत्यतथ्य सार्वजनिक गर्न माग गरेका थिए। घटनाको निष्पक्ष अनुसन्धान नभएसम्म आन्दोलन जारी राख्ने उनीहरूको भनाइ छ।
