जनकपुर, २७ कार्तिक । जनकपुरधामको पिडारी चोकमा टिपरको ठक्करबाट स्कुटीमा सवार एक युवकको घटनास्थलमै मृत्यु भएपछि स्थानीय युवाहरूले प्रदर्शन गरेका छन्। दुर्घटनापछि आक्रोशित युवाहरूले स्थानीय सरकार र ट्राफिक प्रहरीको लापरबाहीका कारण घटना भएको आरोप लगाउँदै विरोध जनाएका हुन्।
बिहीबार दिउँसो करिब ४:३० बजे जनकपुरधाम उपमहानगरपालिका–१३ स्थित पिडारी चोकमा दुर्घटना भएको हो। दुर्घटनामा महोत्तरीको मनरासिस्वा नगरपालिका–५ कटैयाका २० वर्षीय नवीन चौधरीको मृत्यु भएको जिल्ला प्रहरी कार्यालय धनुषाले जनाएको छ।
प्रहरीका अनुसार पिडारी चोकबाट रत्नसागर तर्फ जाँदै गरेको मधेश प्रदेश ०२–०१० प ४०६९ नम्बरको स्कुटीलाई सोही दिशाबाट आइरहेको मधेश प्रदेश ०३–००१ ख ७५०४ नम्बरको टिपरले पछाडिबाट ठक्कर दिएको थियो। ठक्करबाट गम्भीर घाइते भएका स्कुटी चालक चौधरीको घटनास्थलमै मृत्यु भएको प्रहरीले पुष्टि गरेको छ।
दुर्घटनापछि प्रहरीले टिपर, स्कुटी र टिपर चालकलाई नियन्त्रणमा लिएको छ। पक्राउ पर्नेमा महोत्तरीको भंगहा नगरपालिका–७ सितापुरका २२ वर्षीय सचिनकुमार सिंह रहेका छन्।
घटनापछि पिडारी चोकमा युवाहरूले सडक सुरक्षा र ट्राफिक व्यवस्थापनमा सम्बन्धित निकायको ध्यानाकर्षण गराउँदै प्रदर्शन गरेका थिए। उनीहरूले चोकमा प्रभावकारी ट्राफिक व्यवस्थापन नहुँदा दुर्घटना भएको आरोप लगाउँदै स्थानीय सरकार तथा ट्राफिक प्रहरीको भूमिकामाथि प्रश्न उठाएका छन्।
यसैबीच, आन्दोलनका क्रममा राति केही युवाहरूलाई प्रहरीले पक्राउ गरेको भन्दै थप आक्रोशित बनेका युवाहरूले विरोध प्रदर्शन गरेका छन्। पक्राउ परेका युवाहरूको रिहाइको मागसमेत उनीहरूले उठाएका छन्।
घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ।
