जनकपुर, २६ कार्तिक । जनकपुरमा टिपरको ठक्करबाट स्कुटीमा सवार एक युवकको घटनास्थलमै मृत्यु भएको छ। बिहीबार दिउँसो करिब साढे ४ बजे जनकपुरधाम उपमहानगरपालिका–१३ स्थित पिडारी चोकमा दुर्घटना भएको हो।
दुर्घटनामा महोत्तरीको मनरासिस्वा नगरपालिका–५ कटैया निवासी २० वर्षीय नवीन चौधरीको ज्यान गएको जिल्ला प्रहरी कार्यालय धनुषाले जनाएको छ।
प्रहरीका अनुसार पिडारी चोकबाट रत्नसागर तर्फ गइरहेको मधेश प्रदेश ०२–०१० प ४०६९ नम्बरको स्कुटीलाई सोही दिशाबाट आइरहेको मधेश प्रदेश ०३–००१ ख ७५०४ नम्बरको टिपरले पछाडिबाट ठक्कर दिएको थियो। ठक्करबाट गम्भीर घाइते भएका स्कुटी चालक चौधरीको घटनास्थलमै मृत्यु भएको प्रहरीले जनाएको छ।
दुर्घटनापछि प्रहरीले स्कुटी र टिपरसहित टिपर चालकलाई नियन्त्रणमा लिएको छ। पक्राउ पर्नेमा महोत्तरीको भंगहा नगरपालिका–७ सितापुर निवासी २२ वर्षीय सचिनकुमार सिंह रहेका छन्।
घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ।
