काठमाडौं,३ कार्तिक । अमेरिकी राष्ट्रपति डोनाल्ड ट्रम्पले न्यू मेक्सिको राज्यको नाम परिवर्तन गरी ‘न्यू अमेरिका’ राख्न प्रस्ताव गरेका छन्। सामाजिक सञ्जाल ट्रुथ सोसलमार्फत उनले नाम परिवर्तन गर्दा घरजग्गाको मूल्य र नागरिकको आम्दानी बढ्ने दाबी गरेका हुन्।
ट्रम्पले नाम परिवर्तनको प्रस्तावसँगै न्यू मेक्सिकोको निर्वाचनमा धाँधली हुने गरेको आरोप पनि दोहोर्याएका छन्। आगामी मध्यावधि निर्वाचनमा अमेरिकी कंग्रेसमा बहुमत कायम राख्न रिपब्लिकन पार्टी संघर्षरत रहेका बेला उनको यस्तो अभिव्यक्ति आएको हो।
यसअघि पनि ट्रम्पले गल्फ अफ मेक्सिकोको नाम परिवर्तन गरी ‘गल्फ अफ अमेरिका’ राख्ने कार्यकारी आदेश जारी गरेका थिए। तर, अमेरिकी राष्ट्रपतिले एकल निर्णयबाट कुनै राज्यको नाम परिवर्तन गर्न सक्दैनन्। त्यसका लागि सम्बन्धित राज्यको कानुनी प्रक्रिया पूरा गर्नुपर्ने हुन्छ।
न्यू मेक्सिकोको नाम १६औँ शताब्दीदेखि प्रचलनमा रहेको छ, जसको ऐतिहासिक सम्बन्ध अमेरिका स्थापना हुनुअघिको समयसँग जोडिएको छ।
