काठमाडौं, २८ असोज । महाकाली नदीमा बेपत्ता भएका सशस्त्र प्रहरी बलका सहायक निरीक्षक (असई) सागरराज थारुको शव पाँच दिनपछि फेला परेको छ।
भत्किएको दोधारा चाँदनी झोलुङ्गे पुलको तारमा अड्किएको अवस्थामा उनको शव भेटिएको हो। नेपाल टेलिकमको चुँडिएको तार तान्ने क्रममा गत शनिबार डुङ्गाबाट खसेर थारु महाकाली नदीमा बेपत्ता भएका थिए।
उनको खोजीमा सशस्त्र प्रहरीको गोताखोर टोलीसमेत परिचालन गरिएको थियो। बर्दियाको ठाकुरबाबा नगरपालिका–६, तुलसीपुर निवासी थारु केही दिनअघि मात्रै दोधारा चाँदनीस्थित देवस्थान बीओपीमा हाजिर भएका थिए।
झोलुङ्गे पुलको पिल्लर भत्किएपछि पुल नदीमा लत्रिएको र टेलिकमको तारसमेत चुँडिएको थियो। महाकालीपारि दोधारा चाँदनीमा सञ्चार सम्पर्क स्थापित गर्न तार तान्ने क्रममा दुर्घटना भएको हो।
