काठमाडौं, २५ असोज । नेकपा एमालेका अध्यक्ष केपी शर्मा ओलीले आफूविरुद्ध जति प्रहार भए पनि पछि नहट्ने बताएका छन्।
उनले जीवनभर देश र जनताको पक्षमा राजनीति गर्ने प्रतिबद्धता व्यक्त गरेका छन्। आइतबार काठमाडौंमा एमालेको सम्पर्क विशेष संगठन कमिटीद्वारा आयोजित मिसन पार्टी जागरण अभियान तथा अगुवा कार्यकर्ता भेलालाई सम्बोधन गर्दै ओलीले आफूमाथि नजिकका व्यक्तिबाट समेत प्रहार भएको बताए।
महाभारतका भीष्म पितामहको प्रसंग उल्लेख गर्दै उनले आफू अझै संघर्ष गर्न सक्षम रहेको बताए। उनले आफूले ५७ वर्षदेखि राजनीतिक आन्दोलनमा सक्रिय भूमिका निर्वाह गर्दै आएको र पञ्चायती व्यवस्था अन्त्य तथा राजतन्त्रको अन्त्य आफ्नो राजनीतिक यात्राका महत्त्वपूर्ण उपलब्धि भएको उल्लेख गरे।
आफूलाई व्यक्तिगत स्वार्थभन्दा देश र जनताको हित महत्त्वपूर्ण रहेको बताउँदै ओलीले बाँचुन्जेल संघर्ष जारी राख्ने र कसैसामु नझुक्ने धारणा व्यक्त गरे।
