काठमाडौं, २६ असोज । कप्तान रोहित पौडेलको उत्कृष्ट शतकको मद्दतमा नेपालले आईसीसी क्रिकेट विश्वकप लिग–२ अन्तर्गत क्यानडाविरुद्धको खेलमा २३६ रनको लक्ष्य प्रस्तुत गरेको छ ।
ओमान क्रिकेट एकेडेमी टर्फ-१ मा टस हारेर पहिले ब्याटिङ गरेको नेपालले निर्धारित ५० ओभरमा सबै विकेट गुमाएर २३५ रन बनाएको हो ।
नेपालको इनिङ्समा रोहितले सर्वाधिक १०१ रन बनाए भने गुल्शन झाले आक्रामक ब्याटिङ गर्दै ४८ रनको योगदान दिए ।
रोहितले १२७ बलको सामना गर्दै आठ चौका र एक छक्का प्रहार गरे । उनले जिम्मेवार ब्याटिङ गर्दै नेपाली टोलीको स्कोरलाई प्रतिस्पर्धात्मक अवस्थामा पुयाए ।
त्यस्तै, गुल्शनले ३४ बलमा ४८ रन बनाउँदै नेपालको रन गति बढाएका थिए । क्यानडाका बलरमध्ये अखिल कुमारले चार विकेट लिए। सुख्जिन्दर सिंहले तीन तथा जहिर शिर्जादले दुई विकेट लिएपछि नेपाल ५० ओभर पूरा हुनुअघि नै अलआउट भयो ।
नेपालको शीर्ष चारमा पुग्ने सम्भावना समाप्त विश्वकप लिग-२ को अन्तिम शृङ्खला खेलिरहेका नेपाल र क्यानडा दुवैका लागि यो खेल महत्त्वपूर्ण छ । यसअघि शृङ्खलाको पहिलो खेलमा ओमानले क्यानडालाई पराजित गरेपछि नेपालको लिग-२ को शीर्ष चारमा पर्ने सम्भावना समाप्त भएको छ ।
कतालिकामा नेपाल ३२ खेलबाट २४ अंकसहित सातौँ स्थानमा छ भने क्यानडा ३३ खेलबाट २५ अंकसहित छैटौँ स्थानमा रहेको छ ।
शीर्ष चारमा पुग्ने सम्भावना समाप्त भएपछि नेपालको मुख्य लक्ष्य एकदिवसीय अन्तर्राष्ट्रिय -ओडीआई) मान्यता जोगाउनु बनेको छ । त्यसका लागि बाँकी खेलमा राम्रो प्रदर्शन गर्दै अंक जोड्नु नेपालका लागि महत्त्वपूर्ण हुनेछ ।
