काठमाडौं, २६ असोज । उदयपुर प्रहरीले जिल्लाका दुई छुट्टाछुट्टै स्थानबाट एक हजार ४० किलो ४४० ग्राम गाँजा बरामद गरेको छ।
गाँजा ओसारपसारमा प्रयोग भएको बोलेरो गाडीसहित प्रहरीले एक युवकलाई पक्राउ गरेको छ भने अन्य संलग्न व्यक्तिहरू फरार रहेका छन्।
चौदण्डीगढी नगरपालिका–१ चारघरेस्थित रानीटार–बेल्टार सडकखण्डमा पार्किङ गरी राखिएको बोलेरो गाडीबाट ९४० किलो ४४० ग्राम गाँजा बरामद गरिएको प्रहरीले जनाएको छ। विशेष सूचनाका आधारमा आइतबार राति गरिएको जाँचका क्रममा २९ वटा बोरामा राखिएको गाँजा फेला परेको थियो।
त्यस्तै, कटारी नगरपालिका–६ स्थित सागुरी पुलनजिकैको जंगलबाट थप १०० किलो गाँजा बरामद गरिएको छ। उक्त गाँजा ओसारपसारमा संलग्न रहेको आरोपमा ताप्ली गाउँपालिका–२ का करिब २२ वर्षीय विश्वराज राईलाई प्रहरीले पक्राउ गरेको हो।
प्रहरीका अनुसार राईलाई तिनतलेबाट सिराहातर्फ गाँजा लैजाँदै गरेको अवस्थामा नियन्त्रणमा लिइएको थियो। घटनामा संलग्न अन्य व्यक्तिहरूको खोजी भइरहेको छ।
बरामद गाँजा र बोलेरो गाडीबारे थप अनुसन्धान भइरहेको जिल्ला प्रहरी कार्यालय उदयपुरले जनाएको छ।
