जनकपुर, २१ असोज । लगातारको हावाहुरी र वर्षाका कारण नेपाली कांग्रेसको १५औँ महाधिवेशनअन्तर्गत चौथो दिनको बन्द सत्र प्रभावित भएको छ।
खुलामञ्चमा आयोजना गरिएको बन्द सत्रमा महाधिवेशन प्रतिनिधिहरू सहभागी हुने तयारी भइरहेका बेला अचानक मौसम बिग्रिएपछि कार्यक्रम प्रभावित भएको कांग्रेस प्रवक्ता देवराज चालिसेले जानकारी दिए। बिहान साढे १० बजे सुरु गर्ने भनिएको सत्र वर्षाका कारण पछि सारिए पनि मौसममा सुधार नआएपछि थप प्रभावित भएको हो।
बन्द सत्रमा विभिन्न प्रस्ताव तथा प्रतिवेदनमाथिको छलफल टुङ्ग्याएर पारित गर्ने कार्यसूची छ। सभापति गगनकुमार थापाको ‘राष्ट्रिय पुनर्जागरण र समुन्नति’सम्बन्धी राजनीतिक प्रस्ताव, उपसभापति विश्वप्रकाश शर्माको समसामयिक प्रस्ताव, महामन्त्री गुरुराज घिमिरेको संगठनसम्बन्धी प्रतिवेदन र कोषाध्यक्ष उमेश श्रेष्ठको आर्थिक प्रतिवेदनमाथि छलफल गर्ने कार्यक्रम रहेको छ।
कांग्रेसले खुलामञ्चमा बन्द सत्र, भृकुटीमण्डपमा खाना तथा राष्ट्रिय सभा गृहमा निर्वाचनसम्बन्धी काम अघि बढाइरहेको छ। महाधिवेशनको मतदान भने भोलि बिहान हुने कार्यतालिका छ।
प्रवक्ता चालिसेका अनुसार बन्द सत्रलाई कांग्रेसको फेसबुक पेजमार्फत प्रत्यक्ष प्रसारण गरिनेछ भने अन्य सञ्चारमाध्यमलाई समेत प्रत्यक्ष प्रसारणको अनुमति दिइएको छ।
