काठमाडौं, २१ असोज । नेपाल रेडक्रस सोसाइटीले रसुवा–भोटेकोशी बाढीबाट प्रभावित परिवारलाई प्रतिपरिवार १ लाख रुपैयाँ नगद सहायता उपलब्ध गराउने भएको छ।
महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्रालय र नेपाल रेडक्रसबीच भएको सम्झौताअनुसार प्रारम्भिक चरणमा करिब ६ हजार प्रभावित परिवारलाई रकम वितरण गरिनेछ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्यांक र आवश्यक प्रमाणीकरणका आधारमा लाभग्राही छनोट गरी रकम सम्बन्धित परिवारको बैंक खातामा सिधै पठाइने रेडक्रसले जनाएको छ।
महिला नेतृत्व भएका परिवार, अपाङ्गता भएका व्यक्ति, ज्येष्ठ नागरिक, सीमान्तकृत समुदाय तथा विशेष आवश्यकता भएका परिवारलाई सहायता वितरणमा प्राथमिकता दिइनेछ। रकम खाद्यान्न, स्वास्थ्य, सरसफाइ, घरायसी सामग्री तथा जीविकोपार्जनका लागि प्रयोग गर्न सकिनेछ।
रेडक्रसले बाढी प्रभावित क्षेत्रमा आवास, खानेपानी, सरसफाइ, मानसिक स्वास्थ्य तथा अन्य मानवीय सहायता पनि जारी राखेको जनाएको छ।
