काठमाडौं, २१ असोज । आज देशका विभिन्न क्षेत्रमा मेघगर्जन, चट्याङ, हावाहुरी र असिनासहित वर्षाको सम्भावना रहेको मौसम पूर्वानुमान महाशाखाले जनाएको छ।
केही स्थानमा भारी वर्षा हुने पूर्वानुमानसमेत गरिएको छ। महाशाखाका अनुसार लुम्बिनी र सुदूरपश्चिमका पहाडी तथा तराई क्षेत्र र बागमती, गण्डकी तथा कर्णालीका पहाडी भूभागका एक–दुई स्थानमा भारी वर्षा हुन सक्नेछ।
दिउँसो हिमाली तथा पहाडी क्षेत्रमा सामान्यदेखि आंशिक बदली रहनेछ। केही स्थानमा मध्यम वर्षा तथा मेघगर्जन, चट्याङ, हावाहुरी र असिनाको सम्भावना छ। राति पनि कोशीसहित हिमाली तथा पहाडी क्षेत्रमा वर्षाको सम्भावना रहेको छ।
तराई क्षेत्रमा बिहानपख हुस्सु तथा कुहिरो लाग्न सक्ने भएकाले दैनिक जनजीवन तथा यातायातमा प्रभाव पर्न सक्ने महाशाखाले जनाएको छ।
मौसमविद्का अनुसार २४ घण्टामा ५० देखि १०० मिलिमिटरसम्म वर्षा भए भारी वर्षा मानिन्छ। यसअघि गत २४ घण्टामा कास्कीसहित देशका विभिन्न स्थानमा भारी वर्षा भएको थियो।
