काठमाडौं, २१ असोज । दसैँलगायत चाडपर्वलाई लक्षित गर्दै नेपाल राष्ट्र बैंकले बैंक तथा वित्तीय संस्थालाई एटीएमबाटै १०० रुपैयाँका सुकिला नोट उपलब्ध गराउन निर्देशन दिएको छ।
निर्देशनपछि केही बैंकले नयाँ प्रविधिका एटीएमबाट १०० रुपैयाँका नोट वितरण सुरु गरेका छन्। राष्ट्र बैंकका अनुसार यस वर्ष भोटेकोशी बाढीबाट ठूलो जनधनको क्षति भएकाले नयाँ नोट सटहीबारे छुट्टै औपचारिक सूचना जारी गरिएको छैन।
तर असोज १ गतेदेखि राष्ट्र बैंकका कार्यालय तथा वाणिज्य बैंकका शाखाबाट सुकिला र सफा नोट उपलब्ध हुँदै आएका छन्।
राष्ट्र बैंकका प्रवक्ता गुरुप्रसाद पौडेलले मुद्रा सटही नियमित प्रक्रिया भएकाले चाडपर्वका लागि छुट्टै सूचना आवश्यक नदेखिएको बताए। राष्ट्र बैंकले पछिल्ला केही वर्षदेखि चाडपर्वमा नयाँ नोट वितरण गर्ने परिपाटी क्रमशः घटाउँदै आएको छ।
भदौ ३१ गतेसम्म बजारमा ७ खर्ब ९४ अर्ब रुपैयाँ चलनचल्तीमा रहेको र दसैँका बेला यसको माग ८ देखि १० प्रतिशतसम्म बढ्न सक्ने राष्ट्र बैंकको अनुमान छ।
