काठमाडौं, ३१ भदौ । जनमत पार्टीका अध्यक्ष डा. सीके राउतले विपद् व्यवस्थापनको जिम्मेवारी प्रदेश र स्थानीय तहलाई थप दिनुपर्ने बताएका छन्।
सर्वदलीय बैठकपछि सञ्चारकर्मीसँग कुरा गर्दै राउतले उद्धार, राहत र पुनर्निर्माणका काममा स्थानीय तहलाई अधिकारसम्पन्न बनाउनुपर्ने धारणा राखे। रसुवा बाढीबाट पूर्वसूचना तथा तत्काल उद्धार प्रणालीका कमजोरी देखिएको भन्दै उनले यसलाई सुधारको अवसरका रूपमा लिनुपर्ने बताए।
उनका अनुसार संघीय सरकारले स्थानीय तहका साना–साना काममा हस्तक्षेप गर्नुको सट्टा अन्तर्राष्ट्रिय स्रोत, प्रविधि, जलवायु वित्त र पूर्वसूचना प्रणाली विकासमा केन्द्रित हुनुपर्छ।
विपद् व्यवस्थापनसम्बन्धी कानुन सुधार र तीन तहका सरकारबीच जिम्मेवारी स्पष्ट गर्न संसदीय समिति गठनका लागि सभामुखसमक्ष अनुरोध गर्ने विषयमा सर्वदलीय बैठकमा सहमति भएको पनि राउतले जानकारी दिए।
