जनकपुर, २७ भदौ । अग्रगामी मोर्चाले जनकपुरमा आयोजना गरेको मधेश प्रदेशस्तरीय कार्यकर्ता भेला तथा अभिमुखीकरण कार्यक्रममा अपेक्षाभन्दा उल्लेख्य रूपमा बढी कार्यकर्ताको सहभागिता देखिएको छ।
कार्यक्रमका लागि व्यवस्थापन गरिएको सभाहलमा सहभागीहरू नअटाएपछि ठूलो संख्यामा कार्यकर्ता हल बाहिरसमेत उभिएर कार्यक्रमलाई पछ्याइरहेका थिए। आयोजकले अपेक्षा गरेको भन्दा बढी सहभागिता भएपछि कार्यक्रमस्थलमा कार्यकर्ताको चहलपहल बढेको थियो।
कार्यक्रममा मधेश प्रदेशका विभिन्न जिल्लाबाट आएका नेता तथा कार्यकर्ताको सहभागिता रहेको आयोजकले जनाएको छ। भेलामा मोर्चामा आबद्ध विभिन्न दलका नेता तथा प्रतिनिधिहरूले समसामयिक राजनीतिक विषय, मधेशका समस्या तथा आगामी राजनीतिक कार्यदिशाबारे आफ्ना धारणा राख्ने कार्यक्रम रहेको छ।
कार्यक्रममा जनता समाजवादी पार्टी (जसपा) नेपालका अध्यक्ष उपेन्द्र यादव, जनमत पार्टीका अध्यक्ष डा. सीके राउत, आम जनता पार्टी (आजपा)का अध्यक्ष प्रभु साह, प्रगतिशील लोकतान्त्रिक पार्टीका जनार्दन शर्मा, नागरिक उन्मुक्ति पार्टी नेपालका रेशमलाल चौधरी, नेपाल संघीय समाजवादी पार्टीका रमेशप्रसाद यादव तथा बहुजन एकता पार्टी नेपालकी शान्ति देवीलगायत नेताहरूले सम्बोधन तथा धारणा राख्ने कार्यक्रम रहेको आयोजकले जनाएको छ।
भेलामा सहभागी कार्यकर्ताहरूले मधेशको राजनीतिक, सामाजिक तथा आर्थिक सवाललाई प्राथमिकतामा राखेर आगामी दिनमा प्रभावकारी रूपमा अघि बढ्नुपर्ने धारणा राखेका छन्। उनीहरूले मधेशका जनताको अपेक्षा, अधिकार र विकासका विषयमा राजनीतिक दलहरूले स्पष्ट नीति तथा कार्यक्रमसहित अघि बढ्नुपर्नेमा जोड दिएका छन्।
आयोजकका अनुसार कार्यकर्ता भेला तथा अभिमुखीकरणको उद्देश्य मोर्चाको राजनीतिक अवधारणा, आगामी कार्ययोजना र संगठन विस्तारबारे कार्यकर्तालाई जानकारी गराउनु हो।
कार्यक्रममार्फत मधेश प्रदेशमा संगठनलाई थप सुदृढ बनाउने तथा जनस्तरमा मोर्चाका एजेन्डा पुर्याउने विषयमा समेत छलफल हुने बताइएको छ।
कार्यक्रमस्थलमा देखिएको उल्लेख्य उपस्थितिलाई आयोजकले मधेशमा वैकल्पिक राजनीतिक शक्तिप्रति देखिएको चासोका रूपमा व्याख्या गरेको छ।
