काठमाडौं, २५ भदौ । सरकारले आज बसेको मन्त्रिपरिषद् बैठकका ७ वटा निर्णय सार्वजनिक गरेको छ। सरकारका प्रवक्ता सस्मित पोखरेलले बैठकका निर्णय सार्वजनिक गरेका हुन्।
मन्त्रिपरिषद्ले प्रधानमन्त्री बालेन्द्र शाहको संयुक्त राष्ट्रसंघको ८१औँ महासभामा सहभागिताका लागि अमेरिका भ्रमण स्वीकृत गर्नेदेखि विभिन्न नियुक्ति, गरिब परिवारको सूची स्वीकृति तथा सचिव बढुवासम्मका निर्णय गरेको छ।
मन्त्रिपरिषद्का ७ निर्णय
- प्रधानमन्त्रीको अमेरिका भ्रमण स्वीकृत: २०८३ असोज ६ देखि १० गतेसम्म संयुक्त राष्ट्रसंघको ८१औँ महासभामा सहभागी हुने प्रधानमन्त्री बालेन्द्र शाह नेतृत्वको नेपाली प्रतिनिधिमण्डलको भ्रमण स्वीकृत गर्ने।
- नेपाल–भारत वार्ता टोली गठन: भारतको नयाँ दिल्लीमा हुने नेपाल–इन्डिया इन्टर–गभर्मेन्टल सब–कमिटीको बैठकमा सहभागी हुन नेपाली वार्ता टोली गठन गर्ने।
- मिटरब्याजसम्बन्धी विधेयक: अनुचित लेनदेन (मिटरब्याज) अपराध नियन्त्रणसम्बन्धी विधेयक तर्जुमा गर्न सैद्धान्तिक स्वीकृति दिने।
- गरिब परिवारको सूची स्वीकृत: काठमाडौं, भक्तपुर, ललितपुर, सप्तरी र दाङका २७ स्थानीय तहमा रहेका १७ हजार ४३८ गरिब घरपरिवारको सूची स्वीकृत गर्ने।
- शिक्षक सेवा आयोगमा नियुक्ति: अध्यक्षमा डा. हरिप्रसाद लम्साल, सदस्यमा रामशरण सापकोटा र महिला सदस्यमा विष्णु घिमिरे रिमाललाई नियुक्त गर्ने।
- विनोदबहादुर कुँवर सचिवमा बढुवा: सहसचिव कुँवरलाई राजपत्राङ्कित विशिष्ट श्रेणीको सचिवमा बढुवा गरी लुम्बिनी प्रदेशको मुख्यमन्त्री तथा मन्त्रिपरिषद्को कार्यालयको प्रमुख सचिवमा पदस्थापन गर्ने।
- उत्तरकुमार खत्री सचिवमा बढुवा: सहसचिव खत्रीलाई सचिवमा बढुवा गरी सुदूरपश्चिम प्रदेशको मुख्यमन्त्री तथा मन्त्रिपरिषद्को कार्यालयको प्रमुख सचिवमा पदस्थापन गर्ने।
