काठमाडौँ, २४ भदौ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले गत वर्ष भदौ २४ गते भएको विध्वंसात्मक घटनाको गहिरो र बहुआयामिक अनुसन्धान गरी वास्तविक दोषी पहिचान गर्नुपर्ने बताएका छन्।
भिडियो सन्देशमार्फत प्रचण्डले भदौ २४ लाई नेपालको इतिहासकै रहस्यमय र भयानक घटनाको दिन भन्दै सत्यतथ्य सार्वजनिक गरी दोषीलाई कारबाही गर्नुपर्ने बताए।
एक वर्ष बितिसक्दा पनि घटनाको अनुसन्धान प्रभावकारी रूपमा अघि बढ्न नसकेको र राष्ट्रिय मानव अधिकार आयोगको प्रतिवेदनसमेत कार्यान्वयन नभएको उनको आरोप छ।
उनले भदौ २३ गते युवाहरूले उठाएको सुशासन र पारदर्शिताको मागलाई भदौ २४ को घटनाले सम्बोधन नगरेको दाबी गर्दै उक्त घटनाले जेनजी युवाको भावना र आकांक्षामाथि प्रहार गरेको बताए।
