काठमाडौँ, २३ भदौ । पूर्वप्रधानमन्त्री सुशीला कार्कीले जनतालाई सुशासनको अनुभूति गराउन नसके संसदमा दुई तिहाइ बहुमत भए पनि त्यसको अर्थ नहुने बताएकी छन्।
जेन–जी आन्दोलनको एक वर्ष पुगेको सन्दर्भमा सामाजिक सञ्जालमार्फत धारणा सार्वजनिक गर्दै कार्कीले राजनीतिक स्थायित्व संसदीय अंकगणितभन्दा शासकको चरित्र र कार्यशैलीमा निर्भर हुने बताइन्।
उनले सुशासन, भ्रष्टाचार नियन्त्रण, विधिको शासन र नागरिक सम्मान सुनिश्चित गर्न सरकार प्रभावकारी बन्नुपर्नेमा जोड दिइन्।
आन्दोलनमा ज्यान गुमाएका युवाप्रति श्रद्धाञ्जली व्यक्त गर्दै उनले घाइतेहरूको शीघ्र स्वास्थ्यलाभको कामना गरिन्। आन्दोलनका क्रममा भएको जनधन र सम्पदाको क्षति दोहोरिन नदिन सबै पक्ष जिम्मेवार र सचेत हुनुपर्ने उनको भनाइ छ।
भोटेकोसी बाढीबाट देश पुनः पीडित बनेको उल्लेख गर्दै कार्कीले अहिले धैर्य, जिम्मेवारी र राष्ट्रिय एकताका साथ अघि बढ्नुपर्ने बताएकी छन्।
