काठमाडौं, २१ भदौ । राष्ट्रिय मुक्ति पार्टी नेपालका अध्यक्ष राजेन्द्र महतोले झापादेखि कञ्चनपुरसम्म हुलाकी राजमार्ग हुँदै तीनमहिने पैदल यात्रा गर्ने भएका छन्।
पार्टीका महासचिव सन्तोष मेहताका अनुसार चाडपर्व सकिएपछि यात्रा सुरु गर्ने तयारी भइरहेको छ। महतोको यात्रामा राजनीतिक भेटघाटसँगै जनताबाट सुझाव संकलन, संगठन विस्तार र पर्यावरण संरक्षणका कार्यक्रम सञ्चालन गरिनेछ।
यात्राका क्रममा विभिन्न स्थानमा वृक्षारोपण गर्ने योजना रहेको पार्टीले जनाएको छ। महासचिव मेहताका अनुसार बदलिँदो राजनीतिक परिस्थितिमा नयाँ ढंगले अघि बढ्न जनताको राय बुझ्नु यात्राको प्रमुख उद्देश्य हो।
