काठमाडौं, १९ भदौ । जनता समाजवादी पार्टी (जसपा) नेपालले पार्टीको नीति, सिद्धान्त र निर्णयविपरीत गतिविधि गरेको भन्दै लुम्बिनी प्रदेशका चार सांसदसहित विभिन्न तहका जनप्रतिनिधि र कार्यकर्तालाई पार्टीबाट निष्कासन गरेको छ।
ललितपुरको बालकुमारीमा भदौ १६ देखि १८ गतेसम्म बसेको केन्द्रीय कार्यकारिणी समितिको बैठकले यस्तो निर्णय गरेको हो। पार्टी निर्णयविपरीत लुम्बिनी प्रदेश सरकारको पक्षमा मतदान गर्दै सरकारमा सहभागी भएका सन्तोषकुमार पाण्डेय, हेमा बेल्वासे (केसी), भण्डारीलाल अहिर र आदेशकुमार अग्रवाललाई निष्कासन गरिएको जसपाले जनाएको छ।
त्यस्तै, लहान नगरपालिकाका उपप्रमुख राम चलित्तर महतोसहित विभिन्न स्थानीय तहका जनप्रतिनिधि, प्रदेश तथा जिल्ला तहका नेता र वडा अध्यक्ष–सदस्यलाई पनि कारबाही गरिएको छ।
बैठकले भोटेकोशी बाढी प्रभावितका लागि प्रधानमन्त्री राहत कोषमा २१ लाख रुपैयाँ सहयोग गर्ने निर्णय गरेको छ। साथै ‘अग्रगामी मोर्चा’ गठनको निर्णयलाई स्वागत गर्दै संगठन सुदृढीकरणका लागि विभिन्न जिल्लामा अगुवा कार्यकर्ता भेला तथा प्रशिक्षण सञ्चालन गर्ने कार्यक्रम तय गरेको छ।
