जनकपुरधाम, १९ भदौ । श्रीकृष्ण जन्माष्टमीको अवसरमा जनकपुर उपमहानगरपालिका–१९ बैगामा भव्य कलश, रथ तथा शोभायात्रा निकालिएको छ ।
श्रीकृष्ण जन्माष्टमी पूजा समितिको आयोजनामा निकालिएको यात्रामा महिला, बालबालिका र भक्तजनको उल्लेख्य सहभागिता रहेको थियो ।
महिलाहरूले शिरमा कलश बोकेर भजन–कीर्तन तथा बाजागाजासहित शोभायात्रामा सहभागिता जनाएका थिए । यात्रामा भगवान् श्रीकृष्णको झाँकीसहित धार्मिक सामग्री प्रदर्शन गरिएको थियो ।
मेला समितिका स्थानीय युवा प्रमोद यादवका अनुसार धार्मिक आस्था, सामाजिक सद्भाव र आपसी एकता अभिवृद्धि गर्ने उद्देश्यले कार्यक्रम आयोजना गरिएको हो ।
उनका अनुसार बैगाबासीको सहयोगमा विगत २५ वर्षदेखि यहाँ जन्माष्टमी मेला आयोजना हुँदै आएको छ ।
यसैबीच, जनकपुर उपमहानगरपालिकाका मेयरका प्रत्यासी शिवशंकर साह ‘हिरा’ले विपद्को समयमा पनि आफ्नो संस्कार र परम्परा नबिर्सिएको भन्दै बैगाबासीलाई धन्यवाद दिएका छन् ।
शोभायात्रामा मधेश प्रदेश सरकारका पूर्वमन्त्री शेषनारायण यादव, ज्ञानेन्द्रकुमार यादव लगायतको उपस्थिति थियो । 
