जनकपुर, १४ साउन । नेपाल रेडक्रस सोसाइटी धनुषाको तदर्थ समितिका सभापति पंकज कुमार महतोले आफू कुनै पनि राजनीतिक दलमा आबद्ध नरहेको दाबी गर्दै सभापति नियुक्त हुनुअघि नै पार्टीबाट राजीनामा दिएको बताएका छन् ।
हालै विभिन्न सञ्चारमाध्यम तथा सामाजिक सञ्जालमा महतो राष्ट्रिय स्वतन्त्र पार्टी -रास्वपा) मा आबद्ध रहँदाहुँदै रेडक्रस धनुषाको सभापति बनाइएको र यसले संस्थाको विधान उल्लंघन गरेको भन्ने समाचार सार्वजनिक भएपछि उनले लिखित स्पष्टीकरण दिएका हुन् ।
महतोका अनुसार उनले गत असार २२ गते नै रास्वपाको सम्बन्धित पार्टी कार्यालयमा राजीनामा पत्र बुझाएका थिए । रेडक्रसको जिम्मेवारी सम्हाल्नुअघि नै आफूले राजनीतिक आबद्धता अन्त्य गरेको भन्दै उनले त्यसको प्रमाणस्वरूप राजीनामा पत्रसमेत सार्वजनिक गरेका छन् ।
उनले नेपाल रेडक्रस सोसाइटीको विधान, मापदण्ड तथा संस्थागत मूल्य–मान्यतालाई पूर्ण रूपमा पालना गरेर मात्रै आफू तदर्थ समितिको सभापति बनेको दाबी गरेका छन् ।
रेडक्रसजस्तो मानवीय सेवामा समर्पित संस्थामा राजनीतिक प्रभाव स्वीकार्य नहुने भएकाले आफूले त्यसलाई ध्यानमा राखेर नै पार्टीबाट अलग भएको उनले बताए ।
