काठमाडौं, २६ जेठ । संसद्मा दर्ता भइसकेको आर्थिक विधेयकमा करका दर परिवर्तन गरिएको विषयलाई लिएर उठेका प्रश्नबीच सरकारका प्रवक्ता तथा शिक्षा एवं खेलकुदमन्त्री सस्मित पोखरेलले अर्थमन्त्री डा. स्वर्णिम वाग्लेको बचाउ गरेका छन् ।
मंगलबार मन्त्रिपरिषद् बैठकपछि सञ्चारकर्मीहरूले करसम्बन्धी व्यवस्थामा भएको भनिएको फेरबदलका विषयमा जिज्ञासा राख्दा प्रवक्ता पोखरेलले अर्थमन्त्रीले निकै मेहनतका साथ बजेट तयार पारेको र सरकारले त्यसलाई पूर्ण समर्थन गर्ने बताएको हो ।
आर्थिक विधेयकमा समावेश करका दरहरूमा संसद्मा पेश गरिएका र पछि अर्थ मन्त्रालयको वेबसाइटमा प्रकाशित दस्तावेजबीच फरक देखिएको भन्दै विपक्षी दलहरूले सरकारको आलोचना गरिरहेका छन् । उनीहरूले यस विषयमा संसदीय छानबिन समिति गठन गरी सत्यतथ्य सार्वजनिक गर्न माग समेत गरेका छन् ।
विवादको केन्द्रमा संसद्मा दर्ता गरिएको आर्थिक विधेयक र पछि सार्वजनिक गरिएको संस्करणबीचको अन्तर रहेको छ । संसद्मा पेश गरिएको विधेयक ४६४ पृष्ठको रहेकामा अर्थ मन्त्रालयको वेबसाइटमा राखिएको संशोधित संस्करण ४४८ पृष्ठको रहेको बताइएको छ ।
यसले १६ पृष्ठ हटाइएको आशंका जन्माएको छ । कानुनविद् तथा संसदीय अभ्यासका जानकारहरूका अनुसार संसद्मा दर्ता भइसकेको विधेयकमा कुनै संशोधन आवश्यक भए त्यसका लागि संसद्को स्वीकृति लिनुपर्ने व्यवस्था छ । संसद्को प्रक्रिया पूरा नगरी मन्त्रालयले एकतर्फी रूपमा विधेयकका प्रावधान परिवर्तन गर्न नमिल्ने उनीहरूको भनाइ छ।
