काठमाडौँ, २१ जेष्ठ । व्यवसायी दीपक भट्ट, सुलभ अग्रवाल र शेखर गोल्छा लगायतमाथि बिमा, धितोपत्र, बैंकिङ तथा सम्पत्ति शुद्धीकरणसम्बन्धी चार कसुरमा मुद्दा चलाउने तयारी भएको छ ।
प्रहरीको केन्द्रीय अनुसन्धान ब्युरो -सीआईबी) ले बिमा र धितोपत्रसम्बन्धी कसुरमा अनुसन्धान प्रतिवेदन सरकारी वकिल कार्यालयमा बुझाइसकेको छ भने सम्पत्ति शुद्धीकरण अनुसन्धान विभागले पनि छुट्टै प्रतिवेदन पेश गरेको छ ।
सीआईबीले बिमा कसुरमा ४० भन्दा बढी र धितोपत्र कसुरमा कम्तीमा ७५ जनालाई प्रतिवादी बनाउन सिफारिस गरेको छ । बिमा कसुरमा करिब ४ अर्ब ६५ करोड रुपैयाँ र धितोपत्र कसुरमा १ अर्ब रुपैयाँ बिगो कायम गर्न राय दिइएको छ।
अनुसन्धानमा विभिन्न कम्पनीमार्फत गैरकानुनी कारोबार, कृत्रिम रूपमा सेयर मूल्य बढाउने तथा जालसाजीपूर्ण कारोबार भएको दाबी गरिएको छ ।
सरकारी वकिल कार्यालयले प्रतिवेदन अध्ययन गरिरहेको जनाएको छ भने बैंकिङ कसुरमा सीआईबीको अनुसन्धान अझै जारी रहेको छ ।
