काठमाडौं, १७ जेठ । नेपाल राष्ट्र बैंकका गभर्नर विश्वनाथ पौडेलले मुलुकमा रहेको उच्च विदेशी मुद्रा सञ्चितिलाई उत्पादनशील क्षेत्रमा परिचालन गर्न सोभरेन वेल्थ फन्ड स्थापना गर्ने अवधारणा अघि सारिएको बताएका छन् ।
अर्थ मन्त्रालयले बजेटपछिको पत्रकार सम्मेलनमा आयोजना गरेको कार्यक्रममा बोल्दै गभर्नर पौडेलले हाल नेपालसँग आवश्यकताभन्दा धेरै विदेशी मुद्रा सञ्चिति रहेको उल्लेख गरेको छ । उनका अनुसार देशलाई करिब ७ महिनाको आयात धान्न सक्ने विदेशी मुद्रा सञ्चिति पर्याप्त हुने भए पनि अहिलेको सञ्चितिले १८ महिनाभन्दा बढीको आयात धान्न सक्ने अवस्था रहेको छ ।
उनले विदेशी मुद्रा सञ्चितिबाट प्राप्त हुने प्रतिफल हाल करिब ४ प्रतिशतको हाराहारीमा सीमित रहेको भन्दै अतिरिक्त सञ्चितिलाई आर्थिक विकास र पूर्वाधार निर्माणजस्ता उत्पादनशील क्षेत्रमा लगानी गर्नुपर्ने आवश्यकता औंल्याए ।
गभर्नर पौडेलका अनुसार सोभरेन वेल्थ फन्डमार्फत विदेशी मुद्रा सञ्चितिको एक हिस्सा दीर्घकालीन आर्थिक विकासमा उपयोग गर्न सकिनेछ। यसले निष्क्रिय रूपमा रहेको स्रोतलाई उच्च प्रतिफल दिने क्षेत्रमा परिचालन गर्न सहयोग पुग्ने विश्वास व्यक्त गरिएको छ ।
उनले मुलुकको आर्थिक स्थायित्व कायम राख्दै अतिरिक्त विदेशी मुद्रा सञ्चितिको प्रभावकारी व्यवस्थापन र उपयोगका लागि नयाँ विकल्पहरू खोज्न आवश्यक रहेको समेत बताए।€
